Promovemos unha iniciativa solidaria dirixida os distintos tipos de centros de Redondela e arredores, (colexios, institutos, centros de maiores, entidades deportivas, etc.) que queiran participar. Con esta iniciativa, apoiaredes o proxecto de instalación no noso centro social dunha COCIÑA SEMIPROFESIONAL para a realización do Módulo Formativo de Hostalería, dos alumnos e alumnas do Programa de Formación Prelaboral.
Trátase de organizar unha merenda ou un almorzo no teu centro, onde cada participante achega un pequeno donativo pola súa cunca de chocolate quente e o seu petisco doce. O donativo para achegar escólleo cada organizador, e en moitas ocasións, prefiren que cada familia ou participante achegue o que consideren de forma libre.
É unha forma de achegar a Diversidade Funcional ós centros, promover o compromiso e reivindicación do dereito á inclusión laboral das persoas con dis-capacidade. Moitos centros organizan chocolatadas nas festas de Nadal. Esta podería ser unha boa data para celebralo.
Se vas a ter festa, que sexa solidaria
En canto ao chocolate, achégao cada centro educativo, anpa, empresa ou entidade organizadora, a quen frecuentemente pedides a colaboración altruísta dalgún provedor interno ou externo.
Aqueles centros ou empresas que prefirades almorzar ou merendar con outro alimento que non sexa o cacao, poden organizalo da mesma forma. Podemos facilitarvos o contacto dun catering que podería servilo, cartelería, videos de presentación da asociación, etc.
PEGADAS CON ALMA, participa na organización e difusión deste proxecto xunto con Andaina na súa iniciativa deste ano #PEGADASXANDAINA.
Contamos coa vosa participación. Faremos un mapa solidario en Redondela e arredores cos centros participantes. Haberá un galardón para o centro máis participativo.
Información e inscripción en: asociacionandainaredondela@gmail.com
www.asociacionandaina.com
II RETO PEGADAS CON ALMA
(#PegadasxAndaina)
Pegadas con Alma é unha iniciativa creada por Patri do Camiño e Heidi Vander Biest para impulsar accións de voluntariado social na área de Redondela.
O primeiro reto en 2021 foi colaborar con Asociación Lenda (Saúde Mental) para a reposición de todo o seu material deportivo; o éxito da campaña, permitiu ademáis cubrir diferentes programas de descanso familiar.
Na súa segunda iniciativa, #PegadasxAndaina, ademais da recadación monetaria para a instalación dunha cociña semiprofesional na que desenvolver ao máximo as capacidades e habilidades dos socios, buscaremos reivindicar a importancia de xerar espazos máis inclusivos en contornas escolares, laborais ou familiares.
A razón última de Pegadas con Alma, que conta co respaldo do Concello de Redondela e a Asociación de Empresarios, é contribuír á construción dunha comunidade máis solidaria, sensible e integrada.